يو ته ر...
ئانه پچی به ینیوه ن کتیویوه تازه چاپ نمه کریو،پچی یو نیه ن قسیوه تازیش په نه بو؟یانی ته مام؟
یانی نووسه ره کی گرد چیوشان وات؟
یانی هیچ په ی واته ی نه مه نه ن؟
یانی ده رده کی خه لکی گرد واچیه یو گرد ده رمانی کریه ی؟
ئه ی پچی یو نامه چه من پرسیاریوه که رو ده رده ت چیشه نه....
نه نه ،ئه م یادم نمه ی...واچی ئه م ئی به ینه وه رمه نه بیی بوو؟مانگیوه،سالیوه ... نه نه نمه پوریو ئه م ئنه یچه که م هوش بییبو.
داخم که س مه زانو قه وره و دوکتر مو سه دقی نا چکو؟داخم که س پی تازه ییه جه باره و گاندی چیویوه ش تازه ش چاپ که رده بو؟
فره دلم ته نگه ن په ی عه ینه که کانش؛داخم یاوه یبان لو کی؟که شکه ی ئیسه بییبیان نه خته ی که ردیبیانیم چه موو دیه یبیان پی خه لکوو چه موو دو لیمانه ره،داخم چیش بینوو؟به زه ننه م پا عه ینه کانه نمه تاوی یه ک نه فه ری بیزینو11!
به ینیوه ن هیچ خه وه ریوه جه مارکزی نیه ن.داخم سه ره تانه که ش یاوا کو؟
واچی گییرووگرفته کی ئادیشانیچ چه نی دیکتاتوره کانشان ته مامی بییبان؟
ئه ی وه شله یشان په نه...
تر ئیسه متمانه م په یدا که رد ئه م زوو تا ئیسه نان وه رمه نه.وه یلا ئی گرد شاعروو نووسه ری چه نی بیی قه تره ی ئاویو لوه ی زه مینه ره...
ئه لبه ت ئیسه هه ر یوشان لی ته لاریوه نه خه ریکینی که یفوو دنیه ی مه که ران
نه نه تر هیچ نه مه نه ن په ی واته ی.
ئه ر خیالوو شیعریوه بدو که له یشان چیش؟ئه لبه ت زوو هوقش مه که ران لی ده سمالیوه و مه وزاش لی ئا کووجیی...
وه ختشه ن ئارو تر بزیوره،
بدیه به ره که چ که کله مووشانیوه گرته ن،که رگیوه چو دیموو به ره که یوه هیلیش
نه که ردیبان؟یادمه نه بو وه خته ی لوانی به ر پا نه نیو پوره شانه ره،
گاهه ز که رگه کی کره که وته و .نشته سه روو هیله کانشوو...هیله کی هور ...
ئوهو هه م شیت بازیه کیم ده س په نه که ردیوه...
به ره که یچ نمه کریووه،چودیم نه گرته بوشان گه چوو سارووج؟پسه به ره و یانه و تیفووسیه کان...
بدیه خه لکی چه نی مه ره مو،ماچی لیانه مروچه نوو ئاویشان گرته نه نه،دیاره ن گرد په له شانه ن،تو واچی؟نووسه ریوه گه وره یا شاعریوه پایه به رز ئامه بو په ی شاره که یمانوو قهر ار بو په ی مه ردمی قسی که رو؟
ئاخ خوداگیان به ش نووسه ریوه جه ولاتوو ئامریکای لاتینی بو،ئاخر ئه م عاشقوو داستانه کانشانه نان،گابریل،وارگاس یوسا،ساراماگو...
ئاغا...خانم...بی زه حمه ت کی؟...پرسیاریوه م...
واچی ئننه دیر هورزه یبوو زوانه که یچشان واریابو؟بو دیاروو ئی به دبه ختیه،داخم به چ زوانیوه قسی مه که ران؟نه کوره ئانه روزنامه کی،تابلوکی...گرد زوانه که و ویمانه ن،ئه ی پچی که س قسی ئه منش حالیه نمه وو؟با چی پیاپیره یه په رسوو،ئاخر ئاد نمه تاوو تن بلو رانه.
ئه ری بابه گیان کی قه راره ن به ی په ی شاره که یمان؟چکو قسی مه که رو په یمان؟تووخودا واچه دیقم که رد.مارکز یا ساراماگو؟ کامشان...
ماچی که روو لال بی!نه کوره قسیوه ش که رده،((ئینه یو ته ر زیاد بی په نه شان))
به کی ؟به چیشی؟تو واچی ئه ژناسه یبووش؟واچی داستانه کی ئه منش وه نیبانیوه؟ده ی چکو؟ئه م واتم88888 :ریوه ی مه ی ئی مه ردمه قه یروو ئه م مه زانان. گاهه ز ئی قاله بونه و ئه منو...
تو واچی ئی پیا کو ره یچه بژناسوم؟!وه خته ن وه شییوه نه بالی گیروونو
-مامو گیان ئینه چیش قومیان؟کی قه ر اره ن به ی؟ئی مه ردمه پچی پیسه حه وه سیه ینیو ره مه ی مه ره مان؟
_چیش ماچی روله؟کی به یو کی بلو؟ماچی تو هیچت نه ژنه ویه ن،ماچان قه راره ن برنج گران بو،ئانه نه خه لکی مه ره مو به لکوو کیلویوه فره ته رش گیر بگنو...
...که رده بیش ده لاقو و یانه که یشوو به که لی سه ره ی قیرنیو هاواری که ری:مه ردم بیاودی یانه که م په ر بیه ن ملی،ئه م تیفووسم گرته ن،به یدی ئا به ره یه گیردی هه ره،
هه ر یانه که یم ئه یر بده یدی،وه یلا گرد ناوه شی مه گندی و تر نمه تاودی برینجه که یتان بوه ردی،برینجه که تان ...برینج ...برینج
پاوه 24/2/ 878787
نویسه ی به هه ورامی جه راسیه نه خزمه ته ن به زوانی کوردی به گشتی،نه دژایه تی چه نی زوانی نه ته وایه تی.دلنیانان هه ر زوانیوه په ی مه نه و ویش مه شیو به گردوو ئا پاژانه که پیکهاته و زوانه که یه نی سه رنجی گردلایه نه بدو.بی گومان ئه گه ر به شی هورامی گه ره کش بو به شداری زوانی یه کگرتوو گه له که یمان که رو،ئانه مسوگه ر نمه وو مه گه ر ئیمه ده قمان بو، واته به ده ق مه شیو بییه و ویمان بسه لمنمی.
چیویوه ته ر که گه ره کمه ن ئاماژه ش په نه که روو ئینه نه که ئیمه هیشتا ریزمانوو هورامیمان به شیویوه باوه ر په نه کریا نه نویسه نو،چوون په خشانمان پاجوره که بشیو نه ویه ن،که په ی ئینه یچه مه شیو به رهه ممان بو تا روه شه ره بتاومی ریزمان بنویسمیوه.
جا ئاکاموو ئی قسی ئینه نه زوانی یه کگرتوو به تیکه ل که رده ووشه و زاراوه کان پیک نمه ی جا زوانی یه کگرتوو پیویستش به ریزمانی یه کگرتوویه ن.
جه مال جه باری - پاوه
